പകുതി വിലയ്ക്ക് സ്കൂട്ടര് തട്ടിപ്പ്; കോണ്ഗ്രസ് നേതാവ് ലാലി വിന്സന്റും പ്രതി
പകുതി വിലയ്ക്ക് സ്കൂട്ടര് തട്ടിപ്പില് കണ്ണൂര് ടൗണ് പൊലീസെടുത്ത കേസില് കോണ്ഗ്രസ് നേതാവ് ലാലി വിന്സന്റും പ്രതി. SPIARDS നിയമ ഉപദേഷ്ടാവായ ലാലി വിന്സന്റ് കേസില് ഏഴാം പ്രതിയാണ്. കണ്ണൂര് ബ്ലോക്കില് 494 പേരില് നിന്ന് 3 കോടിയോളം തട്ടിയെന്നാണ് കേസ്. അനന്തു കൃഷ്ണന് ഉള്പ്പെടെ കേസില് ഏഴ് പ്രതികളാണുള്ളത്.
പകുതി വിലയ്ക്ക് സ്കൂട്ടര് തട്ടിപ്പിലെ പ്രതി അനന്തു കൃഷ്ണനെതിരെ കണ്ണൂരില് മാത്രം രണ്ടായിരത്തോളം പരാതികളാണുള്ളത്. കണ്ണൂര്, തളിപ്പറമ്പ്, ശ്രീകണ്ഠപുരം, മയ്യില്, വളപട്ടണം, പയ്യന്നൂര് സ്റ്റേഷനുകളിലാണ് പരാതി ലഭിച്ചിട്ടുള്ളത്.
അനന്തു കൃഷ്ണനെതിരെ പരാതികളുടെ എണ്ണം ദിനം പ്രതി കൂടുകയാണ്. പകുതി വിലയ്ക്ക് ലാപ്ടോപ്പ്, തയ്യല് മെഷീന് തുടങ്ങിയവയും പ്രതി വാഗ്ദാനം ചെയ്തിരുന്നു. പണംതിരികെ ചോദിച്ചാല് ഭീഷണിയെന്നും പരാതിയുണ്ട്.
അതേസമയം അനന്തു കൃഷ്ണന് പ്രതിയായ സി എസ് ആര് ഫണ്ട് തട്ടിപ്പില് ബിജെപി സംസ്ഥാന സമിതി അംഗം കെ എന് ഗീതാകുമാരി പുതിയ വെളിപ്പെടുത്തലുമായി രംഗത്തെത്തിയിരുന്നു. പലതവണയായി 25 ലക്ഷം രൂപ തന്നില് നിന്നും തട്ടിയെടുത്തുവെന്നും പണം വാങ്ങിയത് ജെ പ്രമീള ദേവിയുടെ പി എ ആയിരിക്കേ ആണെന്നും അനന്തു നല്കിയ ചെക്ക് മടങ്ങിയതോടെ കോടതിയെ സമീപിച്ചുവെന്നും ഗീതാകുമാരി പറഞ്ഞു.
പണം വാങ്ങിയത് ബിസിനസ് ചെയ്യാന് എന്ന പേരില് . പ്രമീള ദേവിയും ബിസിനസില് ഉണ്ടെന്ന് പറഞ്ഞു. തന്റെ കയ്യില് നിന്ന് പണം വാങ്ങിയത് പ്രമീള ദേവിക്കും അറിയാം. തട്ടിപ്പ് നടത്തിയതിനുശേഷവും അനന്തു പ്രമീളാദേവിക്ക് ഒപ്പമുണ്ട്. പ്രമീള ദേവിയുടെ ചീഫ് ഇലക്ഷന് ഏജന്റ് ആയിരുന്നു അനന്തു. അനന്തു വിശ്വസ്തന് ആണെന്ന് പ്രമീളാദേവിയും പറഞ്ഞിരുന്നു. തന്നെപ്പോലെ നിരവധി ആളുകള്ക്ക് പണം നഷ്ടമായിട്ടുണ്ട്. പച്ചാളത്തുള്ള ഷെര്ലിക്ക് ഒന്നരക്കോടി നഷ്ടപ്പെട്ടിട്ടുണ്ട്. പണം തട്ടിയെടുത്ത കാര്യം ബിജെപി നേതൃത്വത്തോട് പല തവണ പറഞ്ഞതാണ് എന്നും ഗീതാകുമാരി പറഞ്ഞു.
എ എന് രാധാകൃഷ്ണനും ഇതില് എന്തോ ബന്ധം ഉണ്ടെന്നാണ് കരുതുന്നത്.ചാരിറ്റി സംഘങ്ങളെ കോ ഓര്ഡിനേറ്റ് ചെയ്യാനുള്ള ചുമതല എ എന് രാധാകൃഷ്ണനായിരുന്നു. ഇവര് സംഘടിപ്പിച്ച ഒരുപാട് സ്ഥലത്തെ പരിപാടികളുടെ പോസ്റ്ററുകളില് എ എന് രാധാകൃഷ്ണനെ കണ്ടിരുന്നുവെന്നും ഗീതാകുമാരി വ്യക്തമാക്കി.
