ഉറങ്ങിക്കിടന്ന മകളെ ഡീസല് ഒഴിച്ച് തീയിട്ട് കൊല്ലാന് ശ്രമം; പിതാവ് അറസ്റ്റില്
തിരുവനന്തപുരം: കുടുംബ വഴക്കിനെ തുടര്ന്ന് മകള് ഉറങ്ങിക്കിടന്ന മുറിയിലേക്ക് ഡീസല് ഒഴിച്ച് തീയിട്ട പിതാവിനെ വിഴിഞ്ഞം പൊലീസ് അറസ്റ്റ് ചെയ്തു. മുല്ലൂര് തലയ്ക്കോട് കൃഷ്ണാലയത്തില് രാധാകൃഷ്ണന് (50) ആണ് അറസ്റ്റിലായത്.
ഇന്നലെ ഉച്ചക്ക് രണ്ട് മണിയോടെയായിരുന്നു സംഭവം. കുടുംബ വഴക്കിനെ തുടര്ന്ന് രാധാകൃഷ്ണന് കുറെ ദിവസങ്ങളായി ഭാര്യയും മകളുമായി അകന്ന് കഴിയുകയായിരുന്നു. ഇതിനിടെ രാധാകൃഷ്ണന് വീട്ടില് കയറാതിരിക്കുന്നതിനുള്ള ഉത്തരവ് ഭാര്യ കോടതി മുഖാന്തിരം വാങ്ങിയിരുന്നതായി പൊലീസ് പറയുന്നു. ഇത് ലംഘിച്ച് രാധാകൃഷ്ണന് ഇക്കഴിഞ്ഞ 24നും വീട്ടിലെത്തി പ്രശ്നങ്ങള് ഉണ്ടാക്കി. ഇതിനെതിരെ പരാതി ലഭിച്ചതിനെ തുടര്ന്ന് വിഴിഞ്ഞം പൊലീസ് കേസെടുത്തെങ്കിലും ഇയാള് ഒളിവില് പോയി. ഇതിനിടയിലാണ് ഇന്നലെ ഉച്ചക്ക് വീണ്ടുമെത്തി അക്രമം നടത്തിയത്.
