മുനമ്പം കമ്മിഷന്റെ പ്രവര്‍ത്തനം ഉടന്‍ പുനരാരംഭിക്കും’: ജസ്റ്റിസ് സി എന്‍ രാമചന്ദ്രന്‍
മുനമ്പം കമ്മീഷന്റെ പ്രവര്‍ത്തനം ഉടന്‍ പുനരാരംഭിക്കുമെന്നും കക്ഷികള്‍ സുപ്രീംകോടതിയെ സമീപിച്ചില്ലെങ്കില്‍ പ്രവര്‍ത്തനം തുടരുമെന്നും ജസ്റ്റിസ് സി എന്‍ രാമചന്ദ്രന്‍ മാധ്യമങ്ങളോട് പറഞ്ഞു.മെയ് മുപ്പതിനകം റിപ്പോര്‍ട്ട് സമര്‍പ്പിക്കാനാകും എന്നാണ് പ്രതീക്ഷയെന്നും അദ്ദേഹം കൂട്ടിച്ചേര്‍ത്തു.വഖഫ് നിയമ ഭേദഗതി മുനമ്പം കമ്മീഷന്റെ പ്രവര്‍ത്തനത്തെ ബാധിക്കുമെന്ന് കരുതുന്നില്ലെന്നും ഭേദഗതി നിലവില്‍ വന്നാലും ഓരോ കേസിലും കോടതിയായിരിക്കും തീരുമാനമെടുക്കുകയെന്നും അദ്ദേഹം പറഞ്ഞു. മാത്രമല്ല കക്ഷികള്‍ക്ക് കോടതിയെ സമീപിക്കാനാകുമെന്നും അദ്ദേഹം ചൂണ്ടിക്കാട്ടി.
മുനമ്പം വിഷയത്തിൽ സർക്കാർ നിയോഗിച്ച ജുഡീഷ്യൽ കമ്മീഷന് പ്രവർത്തനം തുടരാമെന്ന് ഹൈക്കോടതി. ജസ്റ്റിസ് സി എൻ രാമചന്ദ്രൻ നായർ കമ്മീഷനെ റദ്ദാക്കിയ സിംഗിൾ ബെഞ്ച് വിധിക്കെതിരെ സർക്കാർ നൽകിയ അപ്പീലിലാണ് ഹൈക്കോടതി ഡിവിഷൻ ബെഞ്ച് വിധി പറഞ്ഞത്.പൊതു താൽപര്യം മുൻനിർത്തിയാണ് കമ്മീഷനെ നിയമിച്ചതെന്നും ക്രമസമാധാന വിഷയം എന്ന നിലയിൽ കമ്മീഷന്റെ അന്വേഷണം ആവശ്യമാണെന്നും സർക്കാർ കോടതിയിൽ നിലപാട് വ്യക്തമാക്കിയിരുന്നു.ജുഡീഷ്യൽ കമ്മീഷണർ റദ്ദാക്കിയ സിംഗിൾ ബെഞ്ച് ഉത്തരവ് നിയമപരമല്ലെന്നും സർക്കാർ വാദിച്ചിരുന്നു. മുനമ്പത്തെ പ്രശ്നപരിഹാരങ്ങൾക്കു പോംവഴികൾ ഉണ്ടെന്നും ആവശ്യമെങ്കിൽ നിയമനിർമാണം നടത്തുമെന്നും സർക്കാർ കോടതിയെ അറിയിച്ചിരുന്നു.
