ടാറ്റ ഹാരിയർ ഇവി ആർഡബ്ല്യുഡി വില പ്രഖ്യാപിച്ചു; കൂടുതൽ വിവരങ്ങൾ ഇവിടെ

ടാറ്റ മോട്ടോഴ്‌സ് അടുത്തിടെ തങ്ങളുടെ പുതിയ ഇലക്ട്രിക് എസ്‌യുവി ടാറ്റ ഹാരിയർ ഇവി ലോഞ്ച് ചെയ്‍തിരുന്നു. എന്നാൽ ലോഞ്ച് സമയത്ത്, കമ്പനി അതിന്റെ എൻട്രി ലെവൽ വേരിയന്റുകളുടെ വില മാത്രമേ പ്രഖ്യാപിച്ചിരുന്നുള്ളൂ. ഇപ്പോഴിതാ ടാറ്റ മോട്ടോഴ്‌സ് ഹാരിയർ ഇവിയുടെ ആർ‌ഡബ്ല്യുഡി വേരിയന്റിന്റെ ഇന്ത്യയിലെ വിലവിവര പട്ടിക പുറത്തിറക്കി. റിയർ-വീൽ ഡ്രൈവ് വേരിയന്റുകൾക്ക് 21.49 ലക്ഷം രൂപയാണ് പ്രാരംഭ വില. ഇത് 27.49 ലക്ഷം രൂപ വരെ എക്സ്-ഷോറൂം വില വരെ ഉയരുന്നു. അതേസമയം ഓപ്ഷണൽ എസി ഫാസ്റ്റ് ചാർജറിനെയോ അതിന്റെ ഇൻസ്റ്റാളേഷനെയോ വിലകൾ ബാധിക്കുന്നില്ല എന്നത് ശ്രദ്ധിക്കേണ്ടതാണ്. 2025 ജൂലൈ 2 ന് ഔദ്യോഗിക ബുക്കിംഗുകൾ ആരംഭിക്കും. നിലവിൽ റിയൽ വീൽ ഡ്രൈവ് വേരിയന്റിന്റെ വിലകൾ മാത്രമേ പ്രഖ്യാപിച്ചിട്ടുള്ളൂ എന്ന് കമ്പനി പ്രസ്താവനയിൽ പറഞ്ഞു. ക്വാഡ് വീൽ ഡ്രൈവ് (ക്യുഡബ്ല്യുഡി) ഡ്യുവൽ-മോട്ടോർ വേരിയന്റിന്റെ വിലകൾ ജൂൺ 27 ന് പ്രഖ്യാപിക്കും.

ടാറ്റ മോട്ടോഴ്‌സ് ഹാരിയർ ഇവിയിൽ യഥാർത്ഥ മോഡലിന്റെ ബോൾഡും മസ്കുലാർ സ്റ്റൈലിംഗും നിലനിർത്തിയിട്ടുണ്ട്. ഡീസൽ പതിപ്പിന്റെ അതേ ഡേടൈം റണ്ണിംഗ് ലൈറ്റുകളും (DRL) ഹെഡ്‌ലാമ്പുകളും ഇതിലുണ്ട്. എന്നാൽ ഇതിന് ഒരു പ്രത്യേക ഐഡന്റിറ്റി നൽകുന്ന ഒരു പുതിയ ഗ്രില്ലും ബമ്പറും ലഭിക്കുന്നു. പുറം ബോഡിയിൽ മൂർച്ചയുള്ള ക്രീസുകളും വൃത്തിയുള്ള വരകളും കാണപ്പെടുന്നു. ഇതിനുപുറമെ, തുടർച്ചയായ എൽഇഡി ഡിആ‍എല്ലിന്‍റെ ഒരു സ്ട്രിപ്പ് ഇതിനെ കൂടുതൽ ആകർഷകമാക്കുന്നു.

സെഗ്‌മെന്റിൽ ആദ്യമായി 14.53 ഇഞ്ച് ക്യുഎൽഇഡി ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, ഡോൾബി അറ്റ്‌മോസ്, നിർദ്ദിഷ്ട ഓഡിയോ പ്രൊഫൈലുകൾ എന്നിവയുള്ള 10-സ്പീക്കർ ജെബിഎൽ ബ്ലാക്ക് സൗണ്ട് സിസ്റ്റം എന്നിവയും ഹാരിയർ ഇവിയിൽ ഉൾപ്പെടുന്നു. ഫ്രീക്വൻസി ഡിപൻഡന്റ് ഡാമ്പിംഗ് സാങ്കേതികവിദ്യ സജ്ജീകരിക്കുന്ന സസ്‌പെൻഷൻ സജ്ജീകരണവും ഇതിൽ ഉൾപ്പെടുന്നു. ഇ-വാലറ്റ് ഓട്ടോ പാർക്ക് അസിസ്റ്റ്, ഡിജി ആക്‌സസ് എന്ന് വിളിക്കപ്പെടുന്ന ഡിജിറ്റൽ കീ, തടസ്സമില്ലാത്ത ഇൻ-കാർ പേയ്‌മെന്റുകൾക്കായി ടാറ്റയുടെ സ്വന്തം ഡ്രൈവ്‌പേ ഇന്റർഫേസ് തുടങ്ങിയ ഫീച്ചറുകളും ലഭിക്കുന്നു.

ഇലക്ട്രിക് ഹാരിയറിന്റെ ബാറ്ററി സവിശേഷതകൾ വേരിയന്‍റുകൾക്ക് അനുസരിച്ച് വ്യത്യാസപ്പെടും. ഹാരിയർ ഇലക്ട്രിക്കിന് രണ്ട് വ്യത്യസ്ത ബാറ്ററി പായ്ക്കുകളുടെ (65kWh ഉം 75kWh ഉം) ഓപ്ഷൻ ലഭിക്കുന്നു. ഇതിന്റെ ബേസ്-സ്പെക്ക് അഡ്വഞ്ചർ വേരിയന്റിന് 65 kWh ബാറ്ററി പായ്ക്ക് നൽകിയിരിക്കുന്നു. ഇത് റിയർ ആക്‌സിലിൽ (RWD) ഘടിപ്പിച്ചിരിക്കുന്ന 238 PS ഇലക്ട്രിക് മോട്ടോറുമായി ജോടിയാക്കിയിരിക്കുന്നു. അതേസമയം, ഉയർന്ന വേരിയന്റിന് ഡ്യുവൽ-മോട്ടോർ സജ്ജീകരണം ലഭിക്കുന്നു, അതിൽ ഫ്രണ്ട് വീൽ മോട്ടോർ 158 PS അധിക പവർ നൽകുന്നു. ഈ ഇലക്ട്രിക് മോട്ടോറുകൾ ഒരുമിച്ച് 504 ന്യൂട്ടൺ മീറ്റർ (Nm) ടോർക്ക് ഉത്പാദിപ്പിക്കുന്നു. ഈ ഇലക്ട്രിക് എസ്‌യുവിക്ക് 6.3 സെക്കൻഡിനുള്ളിൽ 100 ​​കിലോമീറ്റർ വേഗത കൈവരിക്കാൻ കഴിയും.

ഹാരിയർ ഇലക്ട്രിക്കിന്റെ വലിയ ബാറ്ററി പായ്ക്ക് (75kWh) വേരിയന്റ് ഒറ്റ ചാർജിൽ 627 കിലോമീറ്റർ വരെ ഡ്രൈവിംഗ് റേഞ്ച് നൽകുമെന്ന് കമ്പനി പറയുന്നു. യഥാർത്ഥ ലോകത്ത്, ഈ വേരിയന്റിന് 480 കിലോമീറ്റർ മുതൽ 505 കിലോമീറ്റർ വരെ ഡ്രൈവിംഗ് റേഞ്ച് നൽകാൻ കഴിയും. ടാറ്റ മോട്ടോഴ്‌സ് അവകാശപ്പെടുന്നത് അതിന്റെ ബാറ്ററി 120 kW DC ഫാസ്റ്റ് ചാർജിംഗിനെ പിന്തുണയ്ക്കുന്നു, ഇത് ഏകദേശം 25 മിനിറ്റിനുള്ളിൽ 20 മുതൽ 80 ശതമാനം വരെ ചാർജ് ചെയ്യും. വെറും 15 മിനിറ്റിനുള്ളിൽ ബാറ്ററി ഇത്രയും ചാർജ് ചെയ്യുമെന്നും നിങ്ങൾക്ക് 250 കിലോമീറ്റർ വരെ സഞ്ചരിക്കാൻ കഴിയുമെന്നും കമ്പനി പറയുന്നു.

ടാറ്റയുടെ ഹാരിയർ ഇവി ബാറ്ററിക്ക് കമ്പനി ലൈഫ് ടൈം വാറന്റി നൽകുന്നു. ഹ്യുണ്ടായി ക്രെറ്റ ഇലക്ട്രിക്, മഹീന്ദ്ര XEV 9e, അതിന്റെ സഹോദര BE 6 തുടങ്ങിയ മോഡലുകളുമായി ടാറ്റയുടെ ഈ കാ‍ർ മത്സരിക്കുന്നു.