രാജ്യത്ത് പുതിയതായി 85 കേന്ദ്രീയ വിദ്യാലയങ്ങള് കൂടി; കേരളത്തില് ഒരെണ്ണം
രാജ്യത്ത് പുതിയതായി 85 കേന്ദ്രീയ വിദ്യാലയങ്ങള് കൂടി അനുവദിച്ച് കേന്ദ്ര സര്ക്കാര്. പ്രധാനമന്ത്രി നരേന്ദ്ര മോദിയുടെ അധ്യക്ഷതയില് ചേര്ന്ന സാമ്പത്തിക കാര്യ മന്ത്രിസഭാ സമിതി യോഗത്തിലാണ് പുതിയ തീരുമാനം.
85 കേന്ദ്രീയ വിദ്യാലയങ്ങള് കൂടി പ്രവര്ത്തനമാരംഭിക്കുന്നതോടെ 82,560 വിദ്യാര്ഥികള്ക്ക് പ്രയോജനം ലഭിക്കും. 85 കേന്ദ്രീയ വിദ്യാലയങ്ങള്ക്കൊപ്പം 28 നവോദയ വിദ്യാലയങ്ങളും തുടങ്ങാന് കേന്ദ്ര സര്ക്കാര് തീരുമാനിച്ചു.
കേരളത്തിന് പുതുതായി ഒരു കേന്ദ്രീയ വിദ്യാലയം അനുവദിച്ചിട്ടുണ്ട്. ഇടുക്കിയിലെ തൊടുപുഴയിലാണ് പുതിയ കേന്ദ്രീയ വിദ്യാലയം തുടങ്ങുക. ഇതോടെ കേരളത്തിലെ കേന്ദ്രീയ വിദ്യാലയങ്ങളുടെ എണ്ണം 39 ആകും.
പുതിയത് സ്ഥാപിക്കുന്നതിന് പുറമേ നിലവിലുളളവയുടെ വികസനത്തിനായി 5872 കോടി രൂപയാണ് അനുവദിച്ചത്. നിലവിലെ മാനദണ്ഡങ്ങള് അനുസരിച്ചു്, ഒരു കേന്ദ്രീയ വിദ്യാലയത്തില് 63 പേര്ക്ക് ജോലി ലഭിക്കും. ഒരു കേന്ദ്രീയ വിദ്യാലയത്തിന്റെ വിപുലീകരണത്തിലൂടെ 33 പുതിയ തസ്തികകള് കൂട്ടിച്ചേര്ക്കും.
മോസ്കോ, കാഠ്മണ്ഡു, ടെഹ്റാന് എന്നീ വിദേശമേഖലകളിലെ മൂന്ന് കേന്ദ്രീയ വിദ്യാലയങ്ങള് ഉള്പ്പെടെ നിലവില് പ്രവര്ത്തനക്ഷമമായ 1256 കേന്ദ്രീയ വിദ്യാലയങ്ങളാണ് ഉള്ളത്. മൊത്തം 13.56 ലക്ഷം വിദ്യാര്ഥികള് കേന്ദ്രീയ വിദ്യാലയങ്ങളില് പഠിക്കുന്നുണ്ട്.
