’ഗ്യാനേഷ് കുമാറിനെ ഒഴിവാക്കിയാൽ മോദിക്കും അമിത് ഷായ്ക്കും നല്ലത്, അല്ലാത്തപക്ഷം ഈ സമരം കത്തിപ്പടരും’: ഡോ. ജോൺ ബ്രിട്ടാസ് എംപി
ഇന്ത്യൻ ചരിത്രത്തിലെ ഏറ്റവും പ്രധാനപ്പെട്ട നാഴികക്കല്ലുകളിൽ ഒന്നായി മാറിയേക്കാവുന്ന ദില്ലി ചലോ പ്രക്ഷോഭത്തിനായി 10 ലക്ഷത്തോളം ആളുകളാണ് ദില്ലിയിലേക്ക് ഒഴുകിയെത്തുന്നതെന്ന് ഡോ. ജോൺ ബ്രിട്ടാസ് എംപി. ജനങ്ങളുടെ ഉള്ളിലുള്ള ഉത്കണ്ഠകളും വികാരങ്ങളുമാണ് ഈ വൻ പ്രക്ഷോഭത്തിൽ പ്രതിഫലിക്കുന്നതെന്ന് അദ്ദേഹം പറഞ്ഞു. സമയത്തിന്റെ ചുവരെഴുത്തുകൾ വായിച്ച് ഗ്യാനേഷ് കുമാറിനെ ചുമതലകളിൽ നിന്ന് ഒഴിവാക്കുന്നതായിരിക്കും മോദിക്കും അമിത് ഷായ്ക്കും നല്ലതെന്നും അല്ലാത്തപക്ഷം ഈ സമരം വലിയ രീതിയിൽ കത്തിപ്പടരുമെന്നും അദ്ദേഹം മുന്നറിയിപ്പ് നൽകി. 1980 കളുടെയും 90 കളുടെയും ആദ്യകാലങ്ങളിൽ ഡൽഹി ബോട്ട് ക്ലബ് മൈതാനത്ത് നടന്ന ചരിത്രപ്രസിദ്ധമായ പ്രക്ഷോഭത്തിന് ശേഷം തലസ്ഥാന നഗരി സാക്ഷ്യം വഹിക്കുന്ന ഏറ്റവും വിപുലവും വിശാലവുമായ പ്രതിഷേധമാണിതെന്നും ബ്രിട്ടാസ് എംപി പറഞ്ഞു.
