കര്ണാടകയിൽ നായയുടെ കടിയേറ്റ കുഞ്ഞുമായി പോയ ബൈക്ക് പിടിച്ച് നിർത്തി പൊലീസ്; അമ്മയുടെ മടിയിൽ നിന്നുവീണ മൂന്ന് വയസ്സുകാരിയുടെ ദേഹത്ത് ലോറി കയറി
പിഴ ചുമത്താൻ പോലീസ് തടഞ്ഞു നിർത്തിയതായി പറയപ്പെടുന്ന മോട്ടോർ സൈക്കിളിൽ നിന്ന് വീണ് മൂന്ന് വയസ്സുകാരി മരിച്ചു. കര്ണാടക മണ്ഡ്യയില് ഇന്നലെ വൈകുന്നേരമാണു സംഭവം. റിതീക്ഷയെന്ന കുട്ടിയാണ് മരിച്ചത്. നായയുടെ കടിയേറ്റ കുട്ടിയുമായി ആശുപത്രിയിലേക്കു പോയപ്പോഴായിരുന്നു സംഭവം. പിതാവ് ഹെല്മെറ്റ് ധരിച്ചില്ലെന്ന കാരണത്താലാണ് ബൈക്ക് ട്രാഫിക് പൊലീസ് തടഞ്ഞത്. നിയന്ത്രണം വിട്ട ബൈക്കിൽനിന്ന് അമ്മയുടെ മടിയിലിരുന്ന കുട്ടി റോഡിലേക്കു വീഴുകയും പിന്നാലെ വന്ന ടെംപോ കയറിയിറങ്ങുകയുമായിരുന്നു. തലയ്ക്കേറ്റ ഗുരുതരമായ പരുക്കാണ് മരണകാരണം.
നായ കടിച്ചതുകൊണ്ട് കുട്ടിയെ വേഗം ആശുപത്രിയിൽ എത്തിക്കണമെന്ന് പൊലീസിനോടു പറഞ്ഞതാണെന്ന് കുട്ടിയുടെ ബന്ധു മാധ്യമങ്ങളോടു പറഞ്ഞു. ‘‘ആദ്യത്തെ സംഘം പൊലീസുകാർ ഇതുകേട്ടു ഞങ്ങളെ വിട്ടു. എന്നാൽ എതിർവശത്തുനിന്നു വന്ന രണ്ടാം സംഘം തടയുകയായിരുന്നു. അവരോടു താഴ്മയായി പറഞ്ഞെങ്കിലും കടത്തിവിട്ടില്ല. അതിലൊരു ഉദ്യോഗസ്ഥൻ കൈപിടിച്ചു വലിച്ചു. ഇതേ തുടർന്നാണ് വാഹനത്തിനു നിയന്ത്രണം നഷ്ടമായത്. ബൈക്ക് വശത്തേക്കു വീണു. പൊലീസ് പറഞ്ഞിട്ടാണ് ടെംപോ പിന്നോട്ട് എടുത്തത്. അതു കുട്ടിയുടെ തലയിലൂടെ കയറുകയായിരുന്നു’’ – ബന്ധു പറഞ്ഞു.
കുട്ടിയുടെ മൃതദേഹം ആശുപത്രിയുടെ പ്രവേശന കവാടത്തിൽ വച്ചുകൊണ്ട് മാണ്ഡ്യ മിംസ് ആശുപത്രിക്ക് പുറത്ത് പ്രതിഷേധിച്ചു. പോലീസിനെതിരെ മുദ്രാവാക്യം വിളിച്ച പ്രകടനക്കാർ, നീതി ലഭിക്കുന്നതുവരെ പ്രതിഷേധം തുടരുമെന്ന് പ്രതിജ്ഞയെടുത്ത് പഴയ ബെംഗളൂരു-മൈസൂരു ഹൈവേ ഉപരോധിച്ചു.
കുട്ടിയുടെ കുടുംബവുമായും പ്രതിഷേധക്കാരുമായും പോലീസ് സംസാരിച്ചതായും ഉദ്യോഗസ്ഥർക്കെതിരായ അച്ചടക്ക നടപടി ഉൾപ്പെടെയുള്ള അവരുടെ ആവശ്യങ്ങൾ തിരഞ്ഞെടുക്കപ്പെട്ട പ്രതിനിധികളെ അറിയിച്ചിട്ടുണ്ടെന്നും സർക്കാർ നഷ്ടപരിഹാരം സംബന്ധിച്ച ചർച്ചകൾ നടത്തിയിട്ടുണ്ടെന്നും എസ്പി പറഞ്ഞു. “ഇത്തരം അനിഷ്ട സംഭവങ്ങൾ നമ്മുടെ ജില്ലയിൽ ആവർത്തിക്കില്ലെന്ന് പൊതുജനങ്ങൾക്ക് ഉറപ്പ് നൽകാൻ ഞാൻ ആഗ്രഹിക്കുന്നു. അതിനായി, ജില്ലയിലുടനീളം ശരിയായ സുരക്ഷ ഉറപ്പാക്കാനും ക്രമസമാധാനം നിലനിർത്താനും എല്ലാ ജീവനക്കാർക്കും നിർദ്ദേശം നൽകിയിട്ടുണ്ട്,” അദ്ദേഹം പറഞ്ഞു.
