കോണ്ഗ്രസ് ഗ്രൂപ്പ് പോര്: മുള്ളന്കൊല്ലി പഞ്ചായത്ത് മെമ്പറും കോണ്ഗ്രസ് നേതാവുമായ ജോസ് നെല്ലേടം ആത്മഹത്യ ചെയ്തു
മുള്ളന്കൊല്ലി പഞ്ചായത്ത് മെമ്പറും കോണ്ഗ്രസ് നേതാവുമായ ജോസ് നെല്ലേടം ആത്മഹത്യ ചെയ്തു.വീടിന് അടുത്തുള്ള കുളത്തില് ആണ് മരിച്ച നിലയില് കണ്ടെത്തിയത്. അയല്പ്പക്കക്കാര് കുളത്തില്നിന്നെടുത്ത് പുല്പ്പള്ളിയിലെ സ്വകാര്യ ആശുപത്രിയിലും പിന്നീട് ബത്തേരിയിലെ താലൂക്ക് ആശുപത്രിയിലും എത്തിച്ചെങ്കിലും ജീവന് രക്ഷിക്കാനായില്ല.
പുല്പ്പള്ളിയിലെ തങ്കച്ചന്റെ വീട്ടില് മദ്യവും സ്ഫോടക വസ്തുവും കണ്ടെത്തിയ സംഭവത്തില് ജോസ് നെല്ലേടം ഉള്പ്പെടെയുള്ളവരാണ് പിന്നില് എന്ന് തങ്കച്ചന് ആരോപിച്ചിരുന്നു. കേസിലെ ഗൂഢാലോചനയില് അന്വേഷണം നടക്കവെയാണ് ആത്മഹത്യ.
മുള്ളന്കൊല്ലി രണ്ടാം വാര്ഡ് കോണ്ഗ്രസ് പ്രസിഡന്റ് കനാട്ടുമല തങ്കച്ചനെ കള്ളക്കേസില് കുടുക്കി ജയിലിലടച്ചതിനെ തുടര്ന്ന് സ്ഥലത്ത് കോണ്ഗ്രസ് ഗ്രൂപ്പ് പോര് ശക്തമായിരുന്നു. സ്ഫോടക വസ്തുവും മദ്യവും തങ്കച്ചന്റെ വീട്ടില് കൊണ്ടുവച്ചതാണെന്ന് പൊലീസ് അന്വേഷണത്തില് കണ്ടെത്തുകയും ഒരാളെ അറസ്റ്റ് ചെയ്യുകയും ചെയ്തു.
തുടര്ന്നാണ് നിരപരാധിയാണെന്ന് കണ്ട് തങ്കച്ചനെ ജയിലില്നിന്ന് വിട്ടയച്ചത്. ജയില് മോചിതനായ തങ്കച്ചന് കോണ്ഗ്രസ് നേതാക്കള്ക്കെതിരെ പൊട്ടിത്തെറിച്ചു. ഗൂഢാലോചനയില് അന്വേഷണം പുരോഗമിക്കുന്നതിനിടയിലാണ് ജോസ് നെല്ലേടം ജീവനൊടുക്കിയത്.
