പത്മകുമാറിനെ തള്ളി സിപിഐഎം ജില്ലാ നേതൃത്വം; മന്ത്രിമാരെ പരിഗണിക്കുന്നത് കീഴ്‌വഴക്കമെന്ന് രാജു എബ്രഹാം
പത്തനംതിട്ട: അതൃപ്തി പരസ്യമാക്കിയ പത്തനംതിട്ട ജില്ലാ സെക്രട്ടറിയറ്റ് അംഗവും മുന്‍ എംഎല്‍എയുമായ എ പത്മകുമാറിനെ തള്ളി സിപിഐഎം പത്തനംതിട്ട ജില്ലാ നേതൃത്വം. മന്ത്രിമാരെ പരിഗണിക്കുന്നത് കീഴ്‌വഴക്കമാണെന്നും പത്മകുമാറിന്റെ പ്രതികരണം എന്തുകൊണ്ടാണെന്ന് അറിയില്ലെന്നും രാജു എബ്രഹാം പറഞ്ഞു. വിഷയം പാര്‍ട്ടി വളരെ ഗൗരവത്തോടെ പരിശോധിക്കുമെന്നും രാജു എബ്രഹാം പറഞ്ഞു.ആറന്മുള മണ്ഡലത്തില്‍ വീണാ ജോര്‍ജ് മിന്നുന്ന വിജയമാണ് നേടിയതെന്ന് രാജു എബ്രഹാം ചൂണ്ടിക്കാട്ടി. ശൈലജ ടീച്ചറും ശ്രീമതി ടീച്ചറും തുടങ്ങിവെച്ച പ്രവര്‍ത്തനങ്ങള്‍ തുടരുകയാണ് വീണാ ജോര്‍ജ് ചെയ്യുന്നത്. മന്ത്രി എന്ന നിലയിലുള്ള പ്രവര്‍ത്തനമാണ് വീണ ജോര്‍ജിനെ പാര്‍ട്ടി മുഖ്യമായും ഏല്‍പ്പിച്ചിരിക്കുന്നത്. സംഘടനാപരമായി എല്ലാ മന്ത്രിമാര്‍ക്കും പൂര്‍ണമായും സമയം നീക്കിവെയ്ക്കാന്‍ കഴിയില്ല. സമയം കിട്ടുമ്പോഴൊക്കെ പാര്‍ട്ടി പരിപാടികളില്‍ വീണാ ജോര്‍ജ് പങ്കെടുക്കാറുണ്ട്. പാര്‍ട്ടി ജാഥയില്‍ മന്ത്രി വീണ പങ്കെടുക്കുന്നുണ്ടെന്നും രാജു എബ്രഹാം പറഞ്ഞു.
