ഫേസ്ബുക്കിലൂടെ വെല്ലുവിളിച്ചതും പോസ്റ്റിട്ടതും താന് തന്നെയെന്ന് അര്ജുന് ആയങ്കി; അര്ജുന്റെ ഐ ഫോണ് കണ്ടെത്തി പൊലീസ്
ഫേസ്ബുക്കിലൂടെ വെല്ലുവിളി പോസ്റ്റുകളിട്ടത് താന് തന്നെയെന്ന് ക്രിമിനല് കേസ് പ്രതി അര്ജുന് ആയങ്കി പൊലീസിനോട്. സോഷ്യല് മീഡിയയില് പോസ്റ്റുകളിടാന് പല സ്ഥലങ്ങളില് നിന്നുള്ള വൈ ഫൈ ആണ് ഉപയോഗിച്ചതെന്നും ഇയാള് പറഞ്ഞു. ഭീഷണി പോസ്റ്റ് സമൂഹമാധ്യമങ്ങളിലിടാനായി ഉപയോഗിച്ച അര്ജുന്റെ ഐ ഫോണ് പൊലീസ് കണ്ടെത്തിയിട്ടുണ്ട്.അര്ജുന് ആയങ്കിയെ പിടികൂടിയ അഭിഭാഷകയുടെ അപ്പാര്ട്ട്മെന്റിന് സമീപത്തുവച്ചാണ് ഫോണ് കണ്ടെത്തിയത്. ഭീഷണി പോസ്റ്റ് ഇട്ട ഐഫോണ് 16 പ്രോ ഫോണ് ആണ് കണ്ടെത്തിയത്. ഷൂ റാക്കില് ഒളിപ്പിച്ച നിലയിലായിരുന്നു ഫോണ്. മുമ്പ് അര്ജുന് പിടിയിലായപ്പോള് പൊലീസ് മറ്റൊരു വിവോ ഫോണ് കണ്ടെത്തിയിരുന്നു. എന്നാല് ഈ ഫോണില് നിന്നല്ല പോസ്റ്റുകള് ഇട്ടതെന്ന് പിന്നീട് തെളിയുകയായിരുന്നു.
അര്ജുനെ തലശേരി സിജെഎം കോടതി മൂന്ന് ദിവസത്തെ കസ്റ്റഡിയില് ഇന്നലെ വിടുകയായിരുന്നു. ഇയാളെ വിശദമായി ചോദ്യം ചെയ്യുന്നതിനിടെയാണ് താന് പോസ്റ്റ് ചെയ്ത സോഷ്യല് മീഡിയ കുറിപ്പുകളെക്കുറിച്ചും കമന്റുകളെക്കുറിച്ചും അര്ജുന് പറഞ്ഞത്. എറണാകുളത്തുനിന്ന് കണ്ണൂരിലേക്ക് പോകുംവഴി പൊതുയിടത്തിലെ വൈ ഫൈയാണ് ഇതിനായി ഉപയോഗിച്ചതെന്നും അര്ജുന് പറഞ്ഞു.
അര്ജുന് ആയങ്കിയുമായി പൊലീസ് ഇന്ന് തെളിവെടുപ്പ് നടത്തിയേക്കും. കണ്ണൂരില് ഒളിവില് കഴിഞ്ഞ സ്ഥലങ്ങളില് എത്തിച്ച് തെളിവെടുക്കും.നിര്ണായക അര്ജുന് ആയങ്കി ചോദ്യം ചെയ്യലിനോട് സഹകരിക്കുന്നില്ലെന്ന് പൊലീസ് പറയുന്നു.
