കോവിഡ് സിഎഫ്എൽടിസികളിലെ സാമഗ്രികൾ ഗവ. ആശുപത്രികൾക്ക് കൈമാറും
1 min read

കോവിഡ് കാലത്തെ സിഎഫ്എൽടിസികളിലെ സാമഗ്രികൾ ഉപയോഗിക്കാതെ കിടക്കുന്നതിനാൽ അവ തദ്ദേശ സ്ഥാപനങ്ങൾ വഴി ആവശ്യമുള്ള ഗവ. ആശുപത്രികൾക്ക് കൈമാറാൻ ജില്ലാ വികസന സമിതി യോഗം തീരുമാനിച്ചു. കെ പി മോഹനൻ എംഎൽഎയാണ് ഇതുസംബന്ധിച്ച നിർദ്ദേശം വെച്ചത്. ഉപയോഗിക്കാതെ കിടക്കുന്ന ബെഡുകൾ, ഫർണിച്ചർ, ഫ്രിഡ്ജുകൾ തുടങ്ങിയവയുടെ പട്ടിക തയ്യാറാക്കി തദ്ദേശ സ്ഥാപനങ്ങൾ മുഖേന പിഎച്ച്സി/സിഎച്ച്സികൾക്കോ താലൂക്ക് ആശുപത്രികൾക്കോ കൈമാറണമെന്ന് ജില്ലാ കലക്ടർ നിർദേശിച്ചു. റോഡുകളിലെ വെള്ളക്കെട്ടുകൾ ഒഴിവാക്കാനും തോട് നികത്തൽ, കൈയേറ്റം എന്നിവ ഒഴിപ്പിക്കാനും കലക്ടർ നിർദേശം നൽകി. പ്രീമൺസൂൺ റോഡ് പ്രവൃത്തികൾ വരുന്നയാഴ്ച നടത്തുമെന്ന് പൊതുമരാമത്ത് (റോഡുകൾ) വിഭാഗം അറിയിച്ചു. പഞ്ചായത്ത് റോഡുകളിലും പ്രവൃത്തി നടത്തും. തദ്ദേശ സ്ഥാപനങ്ങളിലെ എൻജിനീയറിംഗ് വിഭാഗത്തിലെ ഒഴിവുകൾ നികത്താൻ യോഗം സർക്കാറിനോട് ആവശ്യപ്പെട്ടു. മറ്റ് നടപടികൾ: കണ്ണൂർ റെയിൽവേ സ്റ്റേഷനിൽ പ്രീപെയ്ഡ് ഓട്ടോ കൗണ്ടർ ആരംഭിക്കാൻ റെയിൽവേ അനുമതി ലഭിച്ചു. ധാരണാപത്രം റെയിൽവേ അംഗീകരിക്കുന്ന മുറയ്ക്ക് തുറന്നുപ്രവർത്തിക്കും.
എടക്കാട് പിഎച്ച്സി ഡയാലിസിസ് യൂനിറ്റിലേക്ക് ഒരു ഡയാലിസിസ് ടെക്നീഷ്യൻ, ഒരു സ്റ്റാഫ് നഴ്സ് എന്നിവരുടെ നിയമന ഉത്തരവ് നൽകി. മരുന്നും മറ്റും വാങ്ങാൻ നടപടി സ്വീകരിക്കും. കെട്ടിടത്തിലെ അറ്റകുറ്റ പ്രവൃത്തി പൂർത്തിയാക്കി രണ്ടാഴ്ചയ്ക്കുള്ളിൽ യൂനിറ്റ് തുറക്കും.
നബാർഡ് സ്കീമിൽ നടപ്പിലാക്കുന്ന വളയഞ്ചാൽ പാലം, ആറളം ഫാം പാലം, ഓടന്തോട് പാലം എന്നിവ ഒരാഴ്യ്ക്കകം പൂർത്തീകരിക്കും. പ്രവൃത്തികൾ അവസാന ഘട്ടത്തിലാണ്.
ചപ്പാരപ്പടവ് കൂവേരി വില്ലേജ് ഓഫീസിന്റെ പുതിയ കെട്ടിടം പൂർത്തിയായിട്ടും ഉദ്ഘാടനത്തിന് തടസ്സമായി നിൽക്കുന്ന വൈദ്യുതി ലൈൻ മാറ്റാനാവശ്യമായ ഫണ്ട് ജില്ലാ കലക്ടർ മുഖേന അനുവദിച്ചു. ലൈൻ മാറ്റി കെട്ടിടം ഉടൻ തുറന്നുകൊടുക്കും.
ജില്ലയിൽ ഐടിഡിപി മുഖേന പട്ടികവർഗ മേഖലയിലെ പ്രവൃത്തികൾ ബ്ലോക്ക് തലത്തിൽ ജില്ലാ കലക്ടർ വിലയിരുത്തും. കോളനികളുടെ ആവശ്യങ്ങൾ അസി. കലക്ടർ ക്രോഡീകരിച്ചിട്ടുണ്ട്.
മാഹി പാലത്തിന്റെ അറ്റകുറ്റപണികൾക്കുള്ള എസ്റ്റിമേറ്റ് തയ്യാറാക്കുന്നതിനായി മെയ് 15ന് സ്ഥലം പൊതുമാരമത്ത് ദേശീയപാത വിഭാഗം സന്ദർശിച്ചിട്ടുണ്ട്. പാലത്തിന്റെ സ്ട്രക്ചറിന് കാര്യമായ കേടുപാടില്ലെന്ന് എക്സിക്യുട്ടീവ് എൻജിനീയർ അറിയിച്ചു. പാലത്തിന്റെ അടിഭാഗം കൂടി പരിശോധിച്ച് എസ്റ്റിമേറ്റ് സമർപ്പിക്കും. മാഹി പാലം ഉൾപ്പെടുന്ന കി.മീ 170/600 മുതൽ 184/600 വരെയുള്ള തലശ്ശേരി-മാഹി ദേശീയപാത 66ന്റെ അറ്റകുറ്റപണിക്കായി 14.26 കോടിയുടെ എസ്റ്റിമേറ്റ് ഈ വർഷം ജനുവരിയിൽ സമർപ്പിച്ചിട്ടുണ്ട്. ജില്ലാ കലക്ടർ എസ് ചന്ദ്രശേഖർ അധ്യക്ഷനായി. എംഎൽഎമാരായ കെ പി മോഹനൻ, രാമചന്ദ്രൻ കടന്നപ്പള്ളി, സബ് കലക്ടർ സന്ദീപ് കുമാർ, അസി. കലക്ടർ മിസാൽ സാഗർ ഭരത്, ഡെപ്യൂട്ടി പ്ലാനിംഗ് ഓഫീസർ ടി രാജേഷ്, എം വി ഗോവിന്ദൻ മാസ്റ്റർ എംഎൽഎയുടെ പ്രതിനിധി, ജില്ലാതല ഉദ്യോഗസ്ഥർ സംസാരിച്ചു. മെയ് 31ന് വിരമിക്കുന്ന സീനിയർ ഫിനാൻസ് ഓഫീസർ കെ സതീശന് യോഗം യാത്രയയപ്പ് നൽകി.
