പെർഫക്ട് ഓക്കെ! ലോറിയിലേക്ക് ഇടിച്ചുകയറ്റി പഞ്ച്; ടാറ്റയുടെ ഇടിപരീക്ഷ
സുരക്ഷയുടെ കാര്യത്തിൽ മുന്നിലാണ് ടാറ്റയുടെ വാഹനങ്ങൾ. ടിയാഗോയും ടിഗോറും ഒഴികെ മറ്റ് വാഹനങ്ങളും ഇടി പരീക്ഷയിൽ ഫൈവ് സ്റ്റാർ റേറ്റിങ് നേടിയിട്ടുണ്ട്. ഇപ്പോഴിതാ പുത്തൻ പഞ്ചിന്റെ ഇടി പരീക്ഷ വൈറലായിരിക്കുകയാണ്. ലോറിയിലേക്ക് ഇടിച്ചുകയറ്റിയാണ് ടാറ്റ പരീക്ഷണം നടത്തിയിരിക്കുന്നത്. ഭാരത് എൻക്യാപ്പ് ടെസ്റ്റിൽ ഫൈവ് സ്റ്റാർ നേടിയാണ് വിപണിയിലേക്ക് എത്തിയിരിക്കുന്നത്.
യാത്രക്കാരുടെ സുരക്ഷ തെളിയിക്കാനായി നാല് ഡമ്മിയും വാഹനത്തിനകത്ത് വെച്ചുകൊണ്ട് 50 കിലോമീറ്റർ വേഗതയിൽ എത്തുന്ന പഞ്ച് നിർത്തിയിട്ടിരിക്കുന്ന ട്രക്കിലേക്ക് ഇടിപ്പിച്ചാണ് പരീക്ഷണം നടത്തിയത്. 6 എയർബാഗുകൾ, ഇലക്ട്രോണിക് സ്റ്റെബിലിറ്റി പ്രോഗ്രാം, എബിഎസ്, ടയർ പ്രഷർ മോണിട്ടറിംഗ് സിസ്റ്റം, 360 ഡിഗ്രി ക്യാമറ, റിവേഴ്സ് പാർക്കിംഗ് സെൻസറുകൾ എന്നീ സേഫ്റ്റി ഫീച്ചറുകളെല്ലാം സ്റ്റാൻഡേർഡായി തന്നെ പഞ്ചിൽ ഒരുക്കിയിട്ടുണ്ട്.
2021-ൽ വിപണിയിൽ അവതരിപ്പിച്ച പഞ്ച് ആദ്യമായാണ് മുഖം മിനുക്കി എത്തിക്കുന്നത്. 5.59 ലക്ഷം രൂപ മുതൽ (എക്സ്-ഷോറൂം) വിലയുള്ള പുതുക്കിയ പഞ്ച്, ഡിസൈൻ, സവിശേഷതകൾ, സുരക്ഷ, പവർട്രെയിൻ ഓപ്ഷനുകളിൽ ശ്രദ്ധേയമായ മാറ്റങ്ങളുമായാണ് എത്തുന്നത്. ടാറ്റ പഞ്ച് ഫെയ്സ്ലിഫ്റ്റ് ആറ് വേരിയന്റുകളിലാണ് വിപണിയിലേക്കെത്തുന്നത്. സ്മാർട്ട്, പ്യുവർ, പ്യുവർ പ്ലസ്, അഡ്വഞ്ചർ, അക്കംപ്ലിഷ്ഡ്, അക്കംപ്ലഷ്ഡ് പ്ലസ് എസ് എന്നിവയാണവ. മാനുവൽ അല്ലെങ്കിൽ AMT ഗിയർബോക്സുകളുമായി ജോടിയാക്കിയ പെട്രോൾ, ടർബോ-പെട്രോൾ, CNG ഓപ്ഷനുകൾ തിരഞ്ഞെടുക്കാം.
