തൃശൂരില്‍ കോണ്‍ഗ്രസിന്റെ പൊളിറ്റിക്കല്‍ സ്‌ട്രൈക്ക്; അടാട്ട് പഞ്ചായത്ത് പിടിക്കാന്‍ അനില്‍ അക്കര
തൃശൂരില്‍ കോണ്‍ഗ്രസിന്റെ പൊളിറ്റിക്കല്‍ സ്‌ട്രൈക്ക്. അടാട്ട് പഞ്ചായത്ത് പിടിക്കാന്‍ മുന്‍ എംഎല്‍എ അനില്‍ അക്കരയെ രംഗത്തിറക്കും. പതിനഞ്ചാം വാര്‍ഡിലാണ് അനില്‍ അക്കര സ്ഥാനാര്‍ഥിയാവുക. എഐസിസി അംഗം കൂടിയായിട്ടുള്ള അനില്‍ അക്കര പഞ്ചായത്തില്‍ സ്ഥാനാര്‍ത്ഥിയാകുന്നു എന്നുള്ളത് സുപ്രധാനമായ നീക്കമായാണ് വിലയിരുത്തപ്പെടുന്നത്. സ്ഥാനാര്‍ഥി നിര്‍ണയം സംബന്ധിച്ചുള്ള അന്തിമ നടപടിക്രമങ്ങളിലേക്ക് കോണ്‍ഗ്രസ് കടന്നു. മണ്ഡലം തല കോര്‍ കമ്മിറ്റി യോഗം അല്‍പസമയത്തിനകം അടാട്ട് ചേരും.
സിപിഐഎമ്മിന്റെ കോട്ടയാണ് അടാട്ട് പഞ്ചായത്ത്. അവിടെ വാര്‍ഡ് മെമ്പറായി തുടങ്ങിയ രാഷ്ട്രീയ പാരമ്പര്യമാണ് അനില്‍ അക്കരയ്ക്കുള്ളത്. പിന്നീട് പഞ്ചായത്ത് അധ്യക്ഷനായും എത്തി. പ്രസിഡന്റായിരിക്കെ നടത്തിയ പ്രവര്‍ത്തനങ്ങള്‍ ഏറെ ശ്രദ്ധ നേടിയിരുന്നു. 2000 മുതല്‍ 2010 വരെയാണ് അദ്ദേഹം അടാട്ട് ഗ്രാമപഞ്ചായത്ത് അംഗമായിരുന്നത്. 2000 മുതല്‍ 2003 വരെ പഞ്ചായത്ത് വൈസ് പ്രസിഡണ്ടായി. 2003 മുതല്‍ 2010 വരെ പഞ്ചായത്ത് പ്രസിഡന്റായി.
ഇത്തരമൊരു പാരമ്പര്യമുള്ളതുകൊണ്ട് തന്നെയാണ് അടാട്ട് പഞ്ചായത്ത് പിടിക്കുന്നതിനായി അനില്‍ അക്കരയെ നിയോഗിക്കുന്നതെന്നാണ് വിവരം.
