വിജയ്യുടെ റോഡ് ഷോയില് വന് തിരക്ക്; റോഡ് ഷോ സമയപരിധി ലംഘിച്ചു; കാരൈക്കുടിയില് പ്രസംഗിക്കാതെ മടങ്ങി വിജയ്
തമിഴ്നാട് കാരെക്കുടിയില് സമയപരിധി ലംഘിച്ച് തമിഴക വെട്രി കഴകം അധ്യക്ഷന് വിജയുടെ റോഡ് ഷോ. മധുര മുതല് കാരൈക്കുടി വരെ റോഡ് ഷോ ആയാണ് വിജയ് പ്രചാരണം നടത്തിയത്. സമയപരിധി അവസാനിച്ചതോടെ, കാരൈക്കുടിയില് പ്രസംഗിയ്ക്കാതെ വിജയ് മടങ്ങി.പന്ത്രണ്ട് മണി മുതല് രണ്ടര മണിവരെയായിരുന്നു വിജയ്ക്ക് കാരൈക്കുടിയില് പ്രചാരണത്തിന് അനുമതി നല്കിയത്. പ്രത്യേക വിമാനത്തില് മധുരയിലെത്തിയ വിജയ്, അവിടെ നിന്നു തന്നെ റോഡ് ഷോ ആരംഭിച്ചു. ഏകദേശം 75 കിലോമീറ്റര് ദൂരം റോഡ് ഷോ. അതിനിടെ സൈക്കിള് ചവിട്ടിയും വിജയുടെ പ്രചാരണം. തിക്കിലും തിരക്കിലും പെട്ട വിജയ്, വേഗത്തില് തന്നെ തിരികെ വാനിലേയ്ക്ക് കയറി.കാരൈക്കുടിയിലെ അവസാന പോയിന്റില് എത്തിയപ്പോള് സമയം 2.40. ഇതോടെ പ്രസംഗിയ്ക്കാതെ വിജയ് മടങ്ങുകയായിരുന്നു. തിരികെ മധുരയിലേയ്ക്കുള്ള യാത്രയും റോഡ് ഷോയാക്കി മാറ്റി. വഴിനീളെ കാത്തിരുന്ന പ്രവര്ത്തകരെയും ആരാധകരെയും അഭിവാദ്യം ചെയ്തു. നാളെ കടലൂരിലും വിഴിപ്പുരത്തും 12ന് കന്യാകുമാരിയിലുമാണ് വിജയുടെ പ്രചാരണം.
