മന്ത്രി വീണാ ജോര്ജിനെതിരെ കടുത്ത വിമര്ശനം; നേതാക്കള്ക്കെതിരെ നടപടിയെടുത്ത് സിപിഐഎം
പത്തനംതിട്ട: മന്ത്രി വീണാ ജോര്ജിനെ വിമര്ശിച്ച് ഫേസ്ബുക്കില് കുറിപ്പ് പങ്കുവെച്ച സംഭവത്തില് നേതാക്കള്ക്കെതിരെ സിപിഐഎമ്മില് നടപടി. ഏരിയാ കമ്മിറ്റി അംഗത്തെ തരംതാഴ്ത്തുന്നതിനൊപ്പം ലോക്കല് കമ്മിറ്റി അംഗത്തെ സസ്പെന്ഡും ചെയ്തു. സിഡബ്ല്യുസി മുന് ചെയര്മാന് അഡ്വ. എന് രാജീവിനെയാണ് ലോക്കല് കമ്മിറ്റിയിലേക്ക് തരംതാഴ്ത്തിയത്. ഇലന്തൂര് ലോക്കല് കമ്മിറ്റി അംഗം പി ജെ ജോണ്സനെ സസ്പെന്ഡ് ചെയ്തു.കോട്ടയം മെഡിക്കല് കോളേജ് ആശുപത്രിയില് കെട്ടിടം തകര്ന്നുവീണ് തലയോലപ്പറമ്പ് സ്വദേശിനി ബിന്ദു മരിച്ച സംഭവത്തിലാണ് മന്ത്രി വീണാ ജോര്ജിനെതിരെ സിപിഐഎം നേതാക്കള് തന്നെ വിമര്ശനവുമായി രംഗത്തുവന്നത്. കൂടുതല് പറയുന്നില്ലെന്നും ഇനി പറയിപ്പിക്കരുതെന്നുമായിരുന്നു എസ്എഫ്ഐ മുന് ജില്ലാ പ്രസിഡന്റ് കൂടിയാണ് പി ജെ ജോണ്സണിന്റെ വിമര്ശനം. ഒരു എംഎല്എയായി ഇരിക്കാന് പോലും മന്ത്രിക്ക് അര്ഹതയില്ലെന്നും ജോണ്സണ് കടന്നാക്രമിച്ചിരുന്നു.മന്ത്രി വീണാ ജോര്ജ് ആശുപത്രിയില് ചികിത്സ തേടിയതിനെയായിരുന്നു എന് രാജീവ് പരോക്ഷമായി വിമര്ശിച്ചത്. സ്കൂളില് കേട്ടെഴുത്ത് ഉണ്ടെങ്കില് വയറുവേദന വരുമെന്നും വയറുവേദന എന്ന് പറഞ്ഞ് വീട്ടില് ഇരിക്കുമെന്നുമായിരുന്നു രാജീവ് പരിഹസിച്ചത്. ഒത്താല് രക്ഷപ്പെട്ടു എന്നാണ് അവസ്ഥയെന്നും എന്നാണ് രാജീവ് പറഞ്ഞത്.കോട്ടയം മെഡിക്കല് കോളേജ് ആശുപത്രിയില് കെട്ടിടം തകര്ന്നുവീണ് രോഗിയുടെ കൂട്ടിരിപ്പുകാരി മരിച്ച സംഭവം വ്യാപക പ്രതിഷേധത്തിന് കാരണമായിരുന്നു.
